Albaner in der Schweiz

D Albaner in de Schwyz (alb. Shqiptarët në Zvicër) sin e Bevölcherigsgrùppe, wo sproochlig ùn kultuurell zum Volch vo de Albaner ghört oder abstammt ùn in de Schwyz läbt. Mer schätzt d Zaal vo de Persone in de Schwyz mit albanischem Hintergrùnd ùff 150'000 bis 200'000 Mänsche. Demit bilde si nooch de Italiener, Ditsche ùn Portugiese eini vo de grööschte Ussländergrùppe in de Schwyz. Di meischte devo stamme ussem Kosovo, en chlynre Deil au uss Nordmazedonie oder Montenegro, ùn nùmme weenigi uss de Republik Albanie. Albanischsproochigi Arbëresh uss Kalabrie in Süditalie werde in de Schwyz meischt als Italiener waargnoo.

Di albanischi Presänz in de Schwyz goot vorallem ùff ehemooligi Saisonniers ùn ihri Aaghörigi zrùgg. Albanischi Saisonniers uss Jugoslawie sin zum erschte Mool in de 1960er Joor, bsùnders aber in de 70er- ùn 80er Joor in d Schwyz cho schaffe. In de spoote 80er- ùn de 90er Joor sin deno au viilmool ihri Familiemitgliider noochzooge. Albanischi Asylsuechendi mache dergäge nùmme en chlyne Aadeil uss, au wenn sich die beide Kategorie mangmool überschnyyde. D albanischstämmigi Bevölcherig isch zum grööschte Deil ùff d Dütschschwyz konzentriert ùn bsùnders ùff d Stedt Züri, Basel, Bärn, Winterthur, St. Galle ùn Luzärn. In de Welschschwyz finde sich gröösseri Grùppe au in de Waadt ùn z Gämf.

Albanischstämmigi Prominänte finde sich in de Schwyz meischt im Sport, wie de Fuessballer Xherdan Shaqiri oder de Thai-Boxer Azem Maksutaj. Dernäbe finde sich albanischstämmigi Persone aber au in de Politik ùn de Wirtschaft, wie d Ylfete Fanaj oder de Behgjet Pacolli, oder in de Kultuur, wie d Sängeri Edita Abdieski oder de Sänger Patrick Nuo.